Verið er að uppfæra heimasíðuna á netþjóni UTM og þess vegna gæti ýmsir hnappar ekki virkað um stundarsakir. Ef uppfærslan mistekst og allt fer á versta veg verður síðan "niðurfærð" aftur. Enn er verið að kanna hvers vegna ekki er hægt að senda póst á starfsmenn í gegnum síðuna og svitna margir við þá vinnu. VIð vonum það besta.

Umsvif Hollvinafélagsins hafa frá stofnun beinst að sögu skólans og varðveislu merkra muna í eigu hans. Herbergi í risi hefur verið tekið undir gömul kennslutæki, landakort og fleira. Hillur hafa verið keyptar og grindur sérsmíðaðar til að hengja á gömul myndaspjöld sem notuð voru við kennslu í ýmsum námsgreinum. Öllu hefur verið haganlega komið fyrir í sjálfboðavinnu stjórnarmanna.

Stöku sinnum leggja pattaralegir heimiliskettir leið sína í skólann. Þegar slíkt gerist er þessum námfúsu ferfætlingum ávallt vísað á dyr enda sum börn haldin ofnæmi fyrir öllu sem dillar loðnu skotti. Á dögunum sást stálpaður kettlingur á vappi um gangana þar sem hann velti fyrir sér hvort hann ætti að fara í tónmennt eða lestrartíma með fyrstu bekkingum.